A viceportavoz parlamentaria do PPdeG, Paula Prado, reprochou á Deputación Provincial de Pontevedra o seu papel na atención e axuda aos afectados pola explosión dun almacén clandestino de pirotecnia en Tui, que causou dous mortos e unha trintena de feridos.
Prado criticou que o goberno provincial "non puxo nin un euro máis que" os destinados inicialmente a Tui para atender ás vítimas do suceso e que tan só permitiu que se desviasen fondos de partidas destinadas a obras "necesarias" en Tui en cuestións como infraestruturas ou saneamento.
Por iso, a deputada popular pediulle á presidenta da Deputación, Carmela Silva, que se comprometa "cos veciños de Tui" e realice unha "achega extraordinaria" tal e como demanda unha "situación extraordinaria e imprevisible".
Se non é capaz diso, engadiu, "o mellor que pode facer é botar a chave, pechar a Deputación e dedicarse a outra cousa".
Na súa intervención, Prado contrastou esta actitude coa mostrada pola Xunta de Galicia, da que destacou a súa capacidade para habilitar unha orde "en tempo marca" e permitir que todos os afectados pola explosión dispoñan dunha liña de axudas por valor de 7,5 millóns de euros para a reconstrución de vivendas, reposición de aveños domésticos, construción de novas vivendas ou complemento para o aluguer.
