Un home de nacionalidade brasileira de 33 anos propietario do club Pigalle, en Meis, foi detido e posto a disposición do xulgado de instrución número 3 de Cambados, que decretou o seu ingreso en prisión cunha fianza de 12.000 euros, acusado de presuntos delitos de trata de seres humanos con fins de explotación sexual por obrigar a prostituírse baixo "coaccións e ameazas" a tres mulleres que traería enganadas desde Venezuela.
As vítimas, con idades comprendidas entre os 18 e 24 anos, levaban tres meses en España en situación irregular cando, na noite do pasado 9 de xullo, axentes do Equipo de Mulleres e Menores (Emume) da Garda Civil de Pontevedra acudiron ao bordel tras ter coñecemento —a través do posto da Benemérita en Cambados— de que habería dúas mulleres sometidas a explotación sexual.
As mozas declararon que se lles prometeu vir traballar a un hotel como "camareiras, facendo camas e limpando habitacións". Con todo, ao chegar ao establecemento, o propietario supostamente reclamoulles 3.000 euros en concepto de débeda polos billetes e os gastos da viaxe; unha cantidade que podían devolver "aos poucos e que aínda así lles sobraría poder enviar diñeiro para mandar ao seu país e axudar ás súas familias", explicou a subdelegada do Goberno en Pontevedra, Maica Larriba, na súa primeira visita á Comandancia da Benemérita en Pontevedra.
OPERACIÓN ABERTA. O xefe da Comandancia da Garda Civil en Pontevedra, Jorge González, precisou que a investigación segue "aberta", a expensas de que as indagacións dos axentes permitan descubrir outras irregularidades.
As vítimas chegaron desde Venezuela enganadas, pensado que ían traballar nun hotel como "camareiras, facendo camas e limpando habitacións"
O club Pigalle fora motivo de polo menos dúas inspeccións anuais nos últimos cinco anos, das que resultaran delitos de contrabando e consumo de drogas. O propio dono do local de alterne, que reside legalmente en Meis, ten antecedentes penais, segundo confirmou Jorge González.
Estas inspeccións periódicas responden, como explicou González, ao mandato do Ministerio de Interior que, "se é posible" increméntanse en número e tamén en caso "de sospeita".
Nesta liña de traballo, a Garda Civil colabora coa Policía Nacional e as delegacións da Inspección de Traballo a nivel estatal e autonómico para verificar a validez da documentación correspondente.
As mozas, de entre 18 e 24 anos, eran forzadas a prostituírse en xornadas de ata 11 horas consecutivas a cambio dun prato de comida ao
Jorge González lamentou que a pesar destes controis, "é preocupante que haxa unha vítima" pero que o feito de que non se detecte a súa presenza "non é que non exista". "Tristemente é o que sucede, moitas chegan enganadas, con ameazas reais e é complicado", explicou sobre a actitude das afectadas por estas mafias ante o seu temor ás represalias.
COLABORACIÓN CIDADÁ. Por iso, Maica Larriba fixo un chamamento " importante colaboración cidadá", argumentando que estes locais adoitan situarse "en contornas rurais onde os veciños máis próximos poden detectar" estas situacións.
Sobre o estado no que se atopan as mulleres rescatadas, e en virtude dos protocolos de colaboración subscritos para estes casos con diversos organismos, Javier González sinalou que se atopan nun centro de acollida "" cuxa localización non precisou por razóns de seguridade. "O normal é que se instrúa un expediente para legalizar a súa situación" ou incoar un expediente de expulsión, aínda que tamén cabería a posibilidade de que "queiran volver" ao seu país de orixe, engadiu a subdelegada.
As vítimas deste presunto proxeneta eran forzadas a prostituírse en xornadas de ata 11 horas consecutivas, ata o extremo de ser "penalizadas economicamente" cando non traballaban, incluso enfermas, relatou Maica Larriba. A cambio, só recibían un prato de comida ao día e durante o tempo que permaneceron practicamente cativas —xa que só "esporadicamente" podían saír do club— "en ningunha ocasión puideron enviar diñeiro a Venezuela". Ao cabo de tres meses de padecer esta situación, "aínda seguen debendo entre 1.400 e 2.400 euros", declararon as vítimas.
