O maxistrado do xulgado de primeira instancia e instrución número un de Carballo decretou este martes o ingreso en prisión de forma provisional do home nacido en 1962 que supostamente matou á súa muller en Cabana de Bergantiños o domingo.
O Tribunal Superior de Xustiza de Galicia comunicou a situación procesual do detido, que accedeu ao edificio xudicial ás 11.00 horas, cando chegou do cuartel da Garda Civil de Carballo, e abandonouno pasadas as 16.00 horas, no mesmos vehículo policial, cos cristais tintados, que o transporta ao cárcere.
Logo de estar ante o xuíz especializado en violencia de xénero de Carballo, capital da comarca de Bergantiños, este decretou o ingreso en prisión comunicada e sen fianza deste home, que se acolleu ao seu dereito a non declarar, sinalaron fontes xudiciais.
Instantes logo do seu acceso á sede xudicial, abandonaron o edificio os dous fillos da parella —un home e unha muller— e o irmán da vítima, que foi o primeiro en acudir no seu auxilio o domingo.
O suceso tivo lugar o pasado domingo no lugar de Tras de Agra, na parroquia de Canduas, onde supostamente o marido da muller falecida, nacida en 1968 e nai de dous fillos, disparoulle tres veces cun revólver para o que non tiña licenza.
