Un consorcio galego liderado por ATI sistemas e o grupo de tecnoloxía enerxética da Universidade de Vigo desenvolveu un dispositivo capaz de capturar e almacenar ata un 50% do CO2 en poscombustión procedente da actividade industrial, informou a institución académica no seu diario dixital.
O desenvolvemento do proxecto, con apoio da Xunta, permitiu unha solución que reduce o consumo enerxético mediante un sistema de secado de gases a baixa presión e libre de sustancias perigosas grazas ao uso de zeolitas 13X como material absorbente.
O sistema ten aínda marxe de mellora, segundo indicou os seus responsables nunha xornada de presentación de resultados celebrada na Escola de Enxeñería de Minas da Universidade de Vigo e na empresa Termocalor.
O proxecto pretende contribuír a mitigar os efectos das emisións de gases de efecto invernadoiro por parte da industria, en liña cos acordos e compromisos internacionais para adoptar medidas tendentes a reducir a emisión de gases de efecto invernadoiro e evitar o cambio climático.
