O PSOE celebra este sábado en Santiago de Compostela un acto conmemorativo do 140 aniversario do partido, que estivo marcado polo eloxio dos distintos relatores ao papel xogado pola Constitución española nos seus corenta anos de vixencia.
Para este evento estaba prevista a presenza da vicesecretaria xeral do partido, Adriana Lastra, quen finalmente non acudiu por problemas de axenda, indicaron fontes da organización.
Así pois, a principal figura deste acto foi o outrora ministro de Transportes durante a primeira lexislatura de Felipe González e expresidente do Parlamento Europeo, Enrique Barón, quen pronunciou un longo discurso para enxalzar os valores do socialismo e a importancia da Carta magna na consolidación da democracia en España.
Barón considerou que o socialismo é unha corrente ideolóxica que procura a "emancipación do xénero humano" e a súa plena liberdade, polo que non perdeu vixencia a pesar dunha crise que obriga a ofrecer "novas propostas porque o mundo e a realidade cambiaron".
Na súa intervención, o exministro recordou a figura do fundador do partido, o galego Pablo Iglesias, e, sen facer de menos a vixencia da Constitución, incidiu na "necesidade da súa reforma para completar un avance no terreo federal".
Barón foi o encargado de abrir un acto no que se recoñeceu coa entrega dunha rosa vermella a decenas de militantes do PSdeG que superan os corenta anos de afiliación ao partido, entre os que se contan o expresidente da Xunta Fernando González Laxe ou algúns dos primeiros secretarios xerais da formación en Galicia.
As mulleres socialistas tamén obtiveron o seu parte de protagonismo neste evento coas intervencións de Marisa Domínguez, a militante máis veterana de todos os presentes, e de Margariña Valderrama, a única representante feminina na primeira executiva nacional galega.
O peche deste acto chegou a cargo do actual secretario xeral do PSdeG, Gonzalo Caballero, que coincidiu con varios dos seus antecesores en destacar a importancia de manter firmes os valores diferenciais do socialismo. Para o líder dos socialistas galegos, esta ideoloxía "foi a referencia para defender as liberdades" e "os avances sociais" conseguidos co paso dos anos e converteuse nun "alicerce fundamental" da construción de España como unha sociedade democrática moderna.
Para rematar, o secretario xeral do partido en Galicia quixo reivindicar o espazo de acción dun PSdeG en total "coordinación" coa dirección federal, pero que dispón da "dose de autonomía" necesaria para actuar no marco dunha "nacionalidade histórica" como a galega.
