Dous funcionarios da prisión de Teixeiro, no municipio coruñés de Curtis, foron agredidos "brutalmente" este mércores por un recluso e foron trasladados de urxencia a un centro médico, informou o sindicato CSIF.
Un dos axentes, que se atopaba nunha das galerías da prisión, "recibiu unha puñada na cara" por parte dun dos reclusos, segundo o sindicato, que considera que corre o risco de sufrir "fractura de pómulo ou mandíbula" debido á agresión.
O outro funcionario, que se atopaba tamén na zona do módulo 13 de primeiros graos, recibiu "golpes que ocasionaron que caese ao chan e quedou sen coñecemento", engade CSIF na nota.
O agresor foi identificado como un mozo de 24 anos coas iniciais H.B.B., estranxeiro, segundo o sindicato, que denuncia que esa terrible "agresión" é consecuencia da "lamentable situación precaria laboral e de risco persoal que sofren os funcionarios de prisións, denunciada reiteradamente".
Lamenta que as autoridades fagan caso omiso das súas denuncias e continúen con total "pasividade e falta de recoñecemento" dunha "situación de sobrecarga laboral a todos os niveis, sufrida en silencio por este colectivo desde hai moito tempo", segundo o sindicato.
Advirte de que esa situación "chegou a un límite inaceptable cando é evidente que se pon en perigo todos os días, xa non só a acumulación de responsabilidades senón a integridade física dos funcionarios" e denuncia tanto os "recortes" orzamentarios e de persoal leváronos a dicir "xa abonda".
Nese sentido, CSIF anuncia o comezo de mobilizacións "para esixir o recoñecemento da precariedade laboral inaceptable" e apunta que convocará unha folga nos próximos días.
Un recluso agride dous funcionarios da prisión de Teixeiro
O sindicato CSIF asegura que este suceso é consecuencia da "lamentable situación precaria laboral e de risco persoal que sofren os funcionarios de prisións"
