Dúas mulleres, ambas de avanzada idade, foron rescatadas nos seus domicilios entre o mércores e xoves polos servizos de Urxencias no municipio de Cedeira. Ao mediodía deste xoves, a Policía local interveu no auxilio dunha muller na súa vivenda, que levaba catro días tirada no corredor, tras o aviso dun coñecido que levaba un tempo sen saber dela.
Doutra banda, os servizos de Protección Civil acudiran durante a noite a atender a outra muller que se atopaba indisposta. Ambos os casos correspóndense con persoas de idade provecta, que non deixaran copia da chave a ninguén. "Normalmente son os veciños ou algún familiar afastado quen co paso do tempo dan a alarma. Recomendamos prestar atención a este tipo de casos, unha chamada a tempo ao 112 pode axudar a salvar a estas persoas e atendelas a tempo", trasladaron desde Protección Civil de Cedeira.
