Unha discusión familiar sen maior transcendencia acabou destapando a violación dunha nena de trece anos, fai xa máis dun ano, a mans do seu padrasto, que foi detido. A nai denunciou a agresión o pasado xoves, cando tivo coñecemento dos feitos, que ao parecer sucederon en 2018. A muller discutiu coa súa parella na súa vivenda -sita nunha poboada zona de Lugo-, en presenza de varios fillos da muller.
Nun momento da rifa, unha das fillas deu a entender con algúns comentarios que o home abusara sexualmente da súa irmá, o que fixo saltar as alarmas da proxenitora. A muller falou coas súas fillas e a vítima acabou confesando que o home a violou. A nena, que cando sucederon os feitos tiña 13 anos, non se atreveu naquel momento a contarllo á súa nai, pero llo recoñeceu co tempo a unha das súas irmás, pouco maior que ela.
O acusado declarou este venres ante o xuíz de garda desde a comisaría da Policía Nacional de Lugo, a través de videoconferencia
As dúas menores gardaron silencio ata o pasado xoves, cando os feitos saíron á luz no transcurso da discusión e a nai deulle total credibilidade ao que contaron as súas fillas. A muller chamou inmediatamente por teléfono á Sala do 091 e varias patrullas da Policía Nacional acudiron ao domicilio. Unha vez alí, os axentes entrevistáronse coa denunciante, coa vítima, que actualmente ten 15 anos, e coa irmá, que tamén segue sendo menor de idade. As dúas nenas contaron que o home cometeu a agresión sexual aproveitando un momento no que a nai estaba fóra do domicilio.
Finalmente, tras escoitar os testemuños das tres, os policías arrestaron ao home. O detido, de 44 anos, foi trasladado a comisaría e este venres prestou declaración ante o xuíz desde comisaría, por videoconferencia, debido á situación especial. Tras ofrecer o seu testemuño, o maxistrado decretou a súa liberdade con cargos.
