Robeto Vilar, actor, humorista e presentador do programa da TVG Land Rober será investido Cabaleiro do Capítulo Serenísimo do Albariño na 66º edición da festa que se celebra a partir deste mércores en Cambados para enxalzar este viño.
Vilar lucirá o vindeiro domingo a capa de cabaleiro xunto á única dama deste ano, a escritora premio Princesa de Asturias Nélida Piñón, e os demais nomeados con esta distinción: o presidente da adega Paco&Lola, Carlos Carrión; o presidente de Freixenet, José Luis Bonet, e José Faro Rúa, empresario galego en Brasil.
O Capítulo Serenísimo deu a coñecer este martes os nomeamentos deste ano, entre os que se inclúen os Albariñenses de Honra que serán a agrupación de Baile Tradicional Con de Xido de Cambados, a Cámara de Comercio e o municipio valisoletano de Cigales, a proposta do Concello de Cambados, así como as Follas de Prata e Xóvenes Albariñenses.
Os actos do Capítulo Serenísimo, como é tradición, terán lugar o domingo, último día da Festa do Albariño, e comezarán ao mediodía coa recepción, no Audiotorio da Xuventude, das 40 confrarías enograstronómicas que participan nesta edición.
Ás 12.30 horas iniciarase o desfile pola Avenida de Madrid ata a praza de Fefiñáns e o Patio de Armas do Palacio, onde se celebra a cerimonia á que está prevista a asistencia do presidente da Xunta, Alberto Núñez Feijóo, en calidade de Gran Mestre da Orde do Albariño.
