O vicepresidente da Xunta e conselleiro de Xustiza, Alfonso Rueda, espera que a mesa sectorial de Xustiza, que convocará para esta semana, sirva para "pechar o conflito definitivamente".
"Non hai ningunha dúbida de que nós queremos, igual que a xente en xeral e especialmente os funcionarios de Xustiza, acabar co conflito xa", explicou este luns aos xornalistas antes dun acto en San Caetano.
Por iso, e ante "niveis de seguimento (da folga indefinida que suma 97 días naturais consecutivos) practicamente testemuñais", sostén que "o que corresponde agora é pechar o conflito definitivamente" e, polo tanto, "a Xunta é o que vai facer".
Contrapón a súa posición á dalgúns sindicatos aos que acusa de querer "continuar con este conflito discutindo o foro para terminalo", pois cre que "sempre" atopan "un motivo para seguir discutindo e prolongar o conflito", xa que SPJ-USO, AXG-CUT, STAJ e CIG advertiron de que na mesa sectorial non se poderían abordar reivindicacións da folga.
Rexeita, xa que logo, continuar as conversacións co comité de folga -que os sindicatos din que é o interlocutor válido- porque, segundo Rueda, "non existe" e quere "convocar un foro" onde están todos os sindicatos, xa que CC OO abandonou ese organismo e nin FeSP UXT nin CSIF acoden ás súas reunións ata que haxa desculpas públicas.
O conselleiro insistiu na "súa intención decidida de pechar o conflito definitivamente" cunha "proposta que cumpre moitísimas das expectativas e moitísimas peticións dos sindicatos" que cre que permitirá resolver a situación.
Preguntado por se a proposta será a mesma que os funcionarios rexeitaron en votación, asegurou que aquel 27 de abril "non se puido votar en liberdade", polo que insistirá no mesmo formulación.
TRABALLO ATRASADO. O conselleiro de Facenda, Valeriano Martínez, avanzou que "haberá que planificar suficientemente o que suporá" a "recuperación" do traballo atrasado pola folga.
"Incluso pode saír oneroso para a Administración, pero non nos pararemos, o importante é recuperar a normalidade na Xustiza", dixo.
Na súa intervención descartou vincular a subida salarial proposta para os funcionarios da Administración de Xustiza de Galicia cos descontos sufridos por estes con motivo da folga.
"O que se aforrou en soldos é como consecuencia dunha chamada que fixeron os sindicatos a unha situación de folga indefinida, non ten que ver unha cousa con outra nin existe carácter compensatorio algún", comentou.
