O vicepresidente da Xunta e conselleiro de Presidencia, Administracións Públicas e Xustiza, Alfonso Rueda, destacou que o PPdeG "vai traballar coma sempre" e que el mesmo está "preparado para traballar no día a día".
Así se pronunciou o vicepresidente galego ao ser preguntado sobre se a súa formación está en situación de afrontar unha posible marcha do seu actual líder, o presidente da Xunta, Alberto Núñez Feijóo, no caso de que presente a súa candidatura para liderar o Partido Popular no conxunto do Estado.
Ademais, requirido tamén para que contestase se el está preparado para substituír a Feijóo, manifestou que, no seu caso, está "preparado para traballar no día a día".
"E con iso bastante teño", sentenciou tras asistir no Tribunal Superior de Xustiza de Galicia (TSXG) a unha reunión para abordar o plan de recuperación na Administración de Xustiza despois da folga de funcionarios.
"PRIMEIRO PARTIDO EN GALICIA". Sobre a situación na que quedaría o PPdeG no caso de que Feijóo opte a liderar o partido a nivel nacional, dixo que esta formación está "preparada para ser o que é". "O primeiro partido en Galicia, un partido que apoia a un goberno cun alto apoio parlamentario".
"Niso é no que está a traballar agora, antes e despois con independencia do que teña que pasar", engadiu Rueda. Con todo, admitiu que, unha vez que se celebre o congreso do PP -os días 20 e 21 de xullo- "pódese dar calquera situación". Con todo, insistiu en que esta formación "vai traballar coma sempre".
