Un condutor resultaba ferido grave nun accidente de tráfico rexistrado ao redor das seis da mañá deste mércores no municipio de Cervo. O sinistro produciuse no quilómetro 53,000 da Nacional 642, onde o turismo no que circulaba o ferido, un Peugeot 407, saíuse da vía e envorcou.
O condutor quedou atrapado no interior do vehículo, inconsciente, e tivo que ser rescatado polos bombeiros. Ata o lugar do accidente desprazáronse tamén unha ambulancia do servizo de Urxencias 061 e unha patrulla do subsector de tráfico da Garda Civil de Lugo.