Santiago de Compostela é a cidade galega máis barata para estacionar o coche en zona O.R.A. ou azul e Ourense a máis cara, conforme ao estudo elaborado pola páxina de cupóns de desconto Cuponatio.
En Ourense a súa zona azul costa 0,75 euros a hora e o límite de estacionamento é de 90 minutos. En cambio, en Santiago sitúase en 55 céntimos a hora.
Aínda que na tarifa xeral e de curta duración Santiago aproxímase aos prezos do resto de cidades galegas, dispón de mellores prezos para residentes e de longa duración, cun prezo de 0,25 euros a hora e un tempo límite de estacionamento de catro horas en ambos os casos.
Os prezos de Santiago, dos máis económicos do país, seguidos dos de Alacante, permiten tamén deixar o vehículo ata 5 horas por 0,30 euros cada 60 minutos.
Estacionar un vehículo en Vigo, Lugo e a zona xeral da Coruña supón 0,60 euros a hora. A única tarifa que se sae deste prezo é a xeral de curta duración da Coruña, cun prezo de 0,70 euros os 60 minutos e que non permite superar este tempo de estacionamento.
Se se teñen en conta as tarifas máis económicas nos parquímetros das principais cidades de España e capitais de provincia, o custo medio do estacionamento cada hora é de 0,71 euros. No caso das máis caras, o prezo por hora ascende ata os 0,98 euros.
Os concellos galegos permiten que quen superen o tempo de estacionamento sinalado no ticket poidan quitar a multa no parquímetro máis próximo. En Galicia, o pago medio desta operación é de 2,22 euros e oscila dos 1,50 euros da Coruña ata os 2,90 de Santiago.
