O Sergas establece un protocolo para illar todos os casos sospeitosos de coronavirus

O Sergas acordou xa o seu protocolo de actuación fronte ao chamado coronavirus de Wuhan, que establece o illamento inmediato dos casos sospeitosos. As medidas apenas difiren das establecidas en pandemias anteriores, como a da Síndrome Respiratoria Aguda Grave (SARS, segundo as súas siglas en inglés) de 2003, iniciada tamén en China. O documento considera sospeitoso de portar o virus a todas as persoas que viaxen recentemente á provincia chinesa de Wuhan ou ás limítrofes, así como a todas as persoas en contacto con elas ou con calquera en estudo por sospeita da enfermidade.

No caso de que chegase un caso a un hospital galego, accederá por un circuíto específico que evita o contacto dese paciente con outros no centro e que "non interfere coa actividade do día a día". Mentres que se lle fai a proba, unha analítica da que tardan en saberse os resultados 24 horas, os pacientes permanecerán ingresados en habitacións de presión negativa. Son as zonas habituais de hospitalización de pacientes con enfermidades infecciosas porque a presión negativa evita que saia aire do seu interior cando se abre a porta.

En todo caso, as medidas extrémanse e esíxese ao persoal sanitario en contacto con ese paciente vestir con traxe protector, máscara, luvas e lentes, e tamén se limitan ao máximo os accesos á habitación. A roupa que leva posta o paciente cando chega ao centro terase que meter en dúas bolsas pechadas, que permanecerán na habitación mentres que Medicina Preventiva decide que facer con ela.

Como o coronavirus se transmite, do mesmo xeito que a gripe, por aerosois –pequenas pingas de saliva ou mucosidade– o obxectivo de todas esas medidas é evitar a súa propagación. Aos centros de saúde comunicóuselles que, en caso de ver un posible caso, deben colocarlle luvas e máscara e comunicalo ao servizo de urxencias para que o derive ao hospital onde se someterá ao test.

¿Que posibilidade hai de que un hospital galego se atope cun caso? "Non me atrevo a dicilo, pero hai que ter en conta que vivimos nun mundo globalizado, no que a poboación viaxa continuamente", recorda o doutor Quintas. Para el, a aprobación deste documento agora, antes de que se diagnosticaron casos en España, que establece pormenorizadamente como debe actuar cada traballador sanitario e que está acordado co Ministerio de Sanidade, é clave para "evitar erros como os que se puideron producir durante a crise do ébola", en referencia ao contaxio da auxiliar de Enfermería Teresa Romero, natural de Becerreá.

"Non hai que alarmarse, pero si estar alerta", sinala e insiste en que a coordinación dos diferentes gobernos e axencias implicadas supón que a sociedade se enfronta á pandemia de forma "máis coherente que outras veces".

Recorda que se trata dun virus cuxa primeira manifestación máis frecuente é a febre. "Cando digo febre non me refiro a febrícula, senón a febres altas, que superan os 38 graos de temperatura", explica, e engade que chega acompañada de malestar e dor de garganta.

A coincidencia da expansión do coronavirus por varios países na súa cuarta semana coa tempada de gripe fai que os síntomas, atribuíbles a varias enfermidades, poidan provocar alarma. Con todo, o coronavirus desemboca nunha síndrome respiratoria aguda e unha pneumonía de rápida evolución.

O doutor Quintas recorda que, en principio, as sospeitas refírense fundamentalmente a viaxeiros desde Wuhan ou esa zona central de China, pero non necesariamente doutras zonas dese país. O protocolo, ademais, recorda aos sanitarios que o coronavirus se manifesta inicialmente con síntomas moi similares a outros dous tipos de gripe aviaria endémica de varias rexións chinesas e que deben ter en conta esa posibilidade se se atopan con viaxeiros enfermos.