O presidente da Xunta, Alberto Núñez Feijóo, anunciou este venres que a próxima semana comezará en Galicia un estudo epidemiolóxico sobre o covid-19 que chegará a cen mil galegos en dúas fases.
Nunha conferencia de prensa telemática, ao termo da reunión semanal do Executivo galego, Núñez Feijóo explicou que se trata do maior estudo realizado en Galicia e que dará unha imaxe suficientemente fiable da extensión da enfermidade na comunidade, dixo.
A primeira fase comezará a finais da próxima semana con 50.925 probas, ás que seguirán, unha vez transcorridas catro semanas, outras tantas. No caso de que unha persoa dea positivo será preciso realizar unha proba PCR para confirmar o diagnóstico e, en todo caso, pediráselle á persoa que ata que realice o PCR se ille no seu domicilio.
Para estas probas a Xunta utilizará os test enviados polo Goberno, xa que eses si serven para un estudo epidemiolóxico, pero non para un diagnóstico directo, explicou o presidente galego.
