A primeira xornada de folga dos funcionarios da Administración de Xustiza de Galicia tivo un seguimento de ata un 95% con setecentos actos xudiciais suspendidos, informa a plataforma convocante que agrupa a sete sindicatos. Fontes do comité de folga, formado polos sindicatos SPJ USO, A Xustiza CUT, FeSP UXT, CSIF, STAJ, CIG e CCOO, explican a Efe que o seguimento da folga en Vigo foi dun 95%; en Pontevedra, un 94%; en Ourense, un 93,7%; en Santiago, un 93%; en Lugo, un 85,16%; e tanto na Coruña como en Ferrol, un 85%.
Noutras localidades da provincia da Coruña como Ribeira, Betanzos, Corcubión, Carballo, Noia e Padrón, o respaldo dos traballadores roldou o 70%. As mesmas fontes engaden que, "a pesar dos servizos mínimos abusivos establecidos pola Xunta", que se respectaron, suspendéronse en Galicia todas as vistas civís, sociais e as non urxentes.
Nunha cidade como A Coruña foron uns cincocentos os actos xudiciais cancelados, mentres que no conxunto de Galicia calculan que se suspenderon uns setecentos. Os folguistas concentráronse ao mediodía ante todas a sede xudiciais, cun cincuenta mobilizados ante os xulgados de Santiago de Compostela.
Alí, Manuel Tejada, do sindicato USO, pediu á Xunta que sente a negociar e non se reúna cos sindicatos "cun documento de peche".
Sobre a última oferta presentada pola Dirección Xeral de Xustiza, considera que na práctica se traduce en "vinte euros anuais", o que é "unha pírrica oferta que non se pode tachar de xenerosa". "A práctica totalidade dos xuízos están a suspenderse. En cuestión de días serán centos e miles os xuízos que se suspenderán na Xustiza galega", comentou.
Nos Rexistros Civís só se tramitan as inscricións de nacemento e estanse expedindo as licenzas de enterramento, aínda que non se fan as inscricións. Este mércores arrincou a primeira xornada dunha folga indefinida, tras varios paros nos últimos meses con seguimentos similares, que afecta a todo o persoal da Administración de Xustiza, excepto xuíces, fiscais e letrados da administración de xustiza.
Entre as actuais reclamacións dos traballadores de xustiza atópanse a equiparación salarial cos empregados doutras comunidades autónomas, o abono do cento por cento do salario ante incapacidades temporais, a concreción da creación de novas prazas, o xa mencionado regreso da mediación ás negociacións e a retribución acorde dos servizos de substitución en estamentos xudiciais superiores.
