Un pequeno submarino tripulado desde un barco do servizo de Salvamento Marítimo tomou hoxe imaxes do pecio do pesqueiro Sin Querer Dos, afundido a semana pasada na zona de Fisterra, que se atopa a máis de cen metros de profundidade.
As imaxes obtidas polo submarino robotizado e non tripulado, divulgadas por Salvamento Marítimo, mostran o pecio a uns 114 metros de profundidade en bo estado, aínda que corresponderá aos expertos analizar o conxunto de fotografías para determinar os indicios sobre as causas do accidente.
O submarino, transportado polo buque Don Inda, de Salvamento Marítimo, rastrexou a zona e localizou o pasado venres o pecio e o sábado logrou confirmar que era o do Sin Querer Dos, que naufragou o pasado 19 de decembro con dez tripulantes a bordo, dos que seis foron rescatados, tres morreron e un continúa desaparecido.
Fontes de Salvamento Marítimo indicaron que a boa visibilidade do fondo mariño permitiu aos expertos ver as imaxes con certa claridade sobre o estado do pecio do buque cerqueiro de 26 metros de eslora que se afundiu por causas descoñecidas cando navegaba a máis de catro millas náuticas do cabo Fisterra nunha zona coñecida como O Profundo. Os tripulantes do buque acababan de deixar unha carga de peixe no porto da Coruña e dirixíanse á súa base, no porto pontevedrés de Sanxenxo.
Agregaron que os expertos deberán elaborar dous informes para determinar as causas do naufraxio e facer as recomendacións que consideren apropiadas.
