A Sección Segunda da Audiencia de Pontevedra suspendeu o xuízo contra José Ramón Prado Bugallo, alias Sito Miñanco, por branqueo de capitais. A sala estuda a petición de recusación de dous dos maxistrados do tribunal por parte da defensa do narco cambadés.
O seu letrado, Gonzalo Boya, sinalaba na sesión do martes que eses dous xuíces –o propio presidente do tribunal, José Juan Barreiro, e María Rosario Cimadevila– estaban "contaminados" por resolver con anterioridade un recurso sobre a causa. E niso se baseaban para pedir a celebración dunha nova vista con outros maxistrados.
Agora o tribunal decidirá sobre a recusación para ver se o xuízo continúa con este ou con outro tribunal. Será un trámite longo e será un xuíz distinto o que decida.
Prado Bugallo chegara á Audiencia de Pontevedra ás 9.58 horas deste xoves para ser xulgado por un delito de branqueo de capitais procedentes do narcotráfico, polo que o fiscal lle pide 6 anos de prisión e 10 millóns de multa.
Miñanco chegou escoltado pola Policía, esposado e cunha botella nas mans. Na primeira xornada do xuízo, celebrada o martes, o tribunal desestimou a petición de nulidade da causa solicitada polos avogados da defensa ao entender que a investigación foi prospectiva e os feitos prescribiron.
Para este xoves, estaban previstas as declaracións de Miñanco e do resto de procesados, a súa primeira muller, a súa cuñada, unha das súas fillas e un empresario polo seu papel como home de palla. A defensa do narco anunciara que este respondería a todas as preguntas na sesión agora suspendida.
ACUSACIÓN. A Fiscalía acusa a Miñanco de blanquear entre 1988 e 2007, a través da inmobiliaria San Saturnino, 10 millóns de euros, mediante a adquisición de bens inmobles en diferentes concellos da provincia, entre eles Pontevedra, Cambados ou Sanxenxo. Este era o único xuízo que tiña pendente o narcotraficante galego ata a súa detención o pasado 5 de febreiro nunha macrooperación antidroga desenvolvida en varios puntos de España e na que resultaron feridos tres axentes da Policía, entre eles un GEO, ao que lle alcanzou unha bala.
Miñanco, de 62 anos, vinte deles pasados en prisión, atopábase en semiliberdade desde abril de 2015 e traballaba como responsable de seguridade dunha empresa de aparcadoiros en Alxeciras.
Con todo, e a pesar de manifestar o seu arrepentimento ao xuíz de vixilancia penal da Audiencia Nacional a cambio da obtención da semilibertad, os investigadores cren que en realidade dirixía desde 2016 unha banda de narcotraficantes dedicada a introducir cocaína en España e a blanquear diñeiro.
