Se atendemos ás sinais que nos manda o ceo nas últimas semanas probablemente nada nos faga presaxiar que faltan só dez días para a chegada do verán. Xuño estivo marcado ata agora pola choiva e por unhas temperaturas baixas para a época do ano. Pero isto pode cambiar esta semana.
Desde o mércores, Galicia quedará baixo a influencia das altas presións e os ceos despexaranse
Segundo a predición de Meteogalicia, o martes producirase unha transición cara ás altas presións, que xa dominarán a situación a partir do mércores. Aínda que o martes amencerá con ceos moi nubrados e choivas débiles durante as primeiras horas, pola tarde está previsto que se vaian abrindo claros e que as temperaturas experimenten un ascenso.
"As altas presións das Azores entrarán durante esta xornada en forma de cuña sobre Galicia achegando estabilidade". Isto é o que indica Meteogalicia xa de cara á xornada do mércores. Néboa e nubes baixas pola mañá pero ceos despexados en xeral xa pola tarde, cos termómetros marcando temperaturas xa máis habituais para un xuño que xa está a chegar ao seu ecuador.
A fin de semana: aumentarán as nubes e baixarán algo as temperaturas, pero a probabilidade de que chova é baixa
O xoves e o venres manterase a influencia do anticiclón das Azores. A estabilidade será predominante, non choverá e as máximas superarán os 25 graos.
En Lugo, onde desde o venres e ata o domingo se celebra o Arde Lucus, o bo tempo acompañará no arranque da festa da recreación histórica.
¿E a fin de semana? Aínda queda moito para poder predicir con fiabilidade, aínda que segundo Meteogalicia a comunidade quedará nunha situación intermedia entre as altas presións e as borrascas do Atlántico. Pero non se asusten: aínda que probablemente aumenten as nubes e baixen algo as temperaturas, a probabilidade de que chova é baixa.