A maior parte da flota galega permaneceu amarrada este mércores polo temporal, que deixou horas de case 7 metros de altura, ventos de máis de 100 quilómetros por hora e máis de 50 litros de auga acumulada en localidades como Forcarei.
Deste xeito, só saíron a faenar parte dos barcos da Mariña lucense, como os da confraría de Burela, tendo en conta que as costas das provincias da Coruña e Pontevedra permanecen este mércores en aviso laranxa por ondas de 6 a 7 metros.
Ademais, rexistráronse ventos de ata 130 quilómetros por hora en Viveiro, 114 en Burela, 108 en Cedeira ou 100 en Ons. En Bueu ou en Vigo houbo refachos de máis de 80 km/hora.
O 112 contabilizou un total de 340 incidentes en apenas dous días. Deste xeito, desde as 13 horas do martes ata as 18 horas deste mércores, rexistráronse un total de 142 incidentes motivados pola caída de vexetación ás estradas e pistas, 38 pola caída de obxectos á vía, 46 accións dos equipos de urxencias para evitar riscos e 17 por acumulación de auga na calzada, entre outros tipos de intervencións menores.
Por provincias, A Coruña (153) foi a que aglutinou o maior número dos incidentes relacionados coa borrasca, seguida de Pontevedra (138), Lugo (30) e Ourense (16).
