Quen tivese plans ao aire libre para celebrar San Valentín puido gozar este xoves dun aliado indiscutible: o bo tempo, que deixou temperaturas case primaverais en toda Galicia. A máxima alcanzouse en Pontevedra, onde os termómetros chegaron a marcar 24,3 graos, pero tamén en concellos como Tui (23,3), A Coruña (23,2), Vigo (22) ou Lugo (20,6) rexistráronse valores similares, segundo os datos recompilados por Meteogalicia.
E é que o sol brillou con forza durante gran parte dunha xornada que estivo caracterizada por un gran contraste térmico: fronte ao agradable calorciño das horas centrais do día, os galegos máis madrugadores tiveron que abrigarse. Por exemplo, os lucenses amenceron baixo cero tanto na cidade romana (-2,8) e noutros concellos da provincia como Vilalba (-3,1), Portomarín (-2,3) e Bóveda (-0,6).
