A revista The Times Luxx, suplemento do xornal británico The Times, fixo mención ao deseño das creacións de Sargadelos, dentro dunha reportaxe sobre cerámica artesá transcende a súa función. "Hai algo fabuloso acerca dunha peza de cerámica cuxa función, xa sexa como cunca, prato ou tetera, vese mellorada cun esmalte decorativo para dar máis pracer visual", relata o texto, no que se explica que Sargadelos elabora a súa cerámica en Galicia, ao norte de España, desde o século XIX, e engade que a firma rexurdiu a mediados do século XX cunha fábrica nova e novos deseños.
Baixo unha fotografía dun xogo de café, explica que este encantador set foi deseñado a finais dos 70, está composto por 12 cuncas pequenas e o seu prezo é de 340 euros.
A mención a Sargadelos foi realizada polo prestixioso director creativo Nick Vinson, especialista en deseño de The Times Luxx, suplemento do xornal británico The Times. Nick Vinson dirixe Vinson & Co, unha oficina con sede en Londres especializada en dirección creativa e entrega de proxectos a medida para a industria de bens de luxo.
Tamén contribuíu á prestixiosa revista Wallpaper durante os últimos 16 anos cunha columna mensual titulada The Vinson View. Precisamente os artigos de Sargadelos atópanse á venda a través da tenda online WallpaperStore.
