Os traballadores da Fundación Pública Urxencias Sanitarias de Galicia-061 e do Grupo Norte, empresa que xestiona a Central de Coordinación, volvéronse a concentrar este mércores para reclamar unha compensación xusta polo trasladado forzoso do servizo á Estrada.
En concreto, o persoal estatutario continúa en folga indefinida desde o pasado día 1 de agosto, mentres que os empregados do centro de chamadas decidiron suspender o paro mentres teñan lugar as negociacións coa compañía.
Nesta ocasión, a protesta, que se desenvolveu coincidindo coa reunión entre a representación do persoal da Central de Coordinación e a dirección do Grupo Norte, tivo lugar ante as instalacións de San Marcos.
Neste escenario, os traballadores despregaron varias pancartas e reclamando unha solución ao conflito laboral derivado do traslado forzoso á Estrada.
Ademais, antes de que finalizase a mobilización, fixeron un percorrido polos exteriores do recinto que finalizou ante a porta da Central de Coordinación.
