O Concello pontevedrés de Tui comezou a dirixirse ás distintas aseguradoras co obxectivo de que revisen os expedientes non resoltos dos seus asegurados afectados pola explosión dun almacén clandestino de material pirotécnico ocorrido na parroquia de Paramos o pasado 23 de maio.
O Consistorio tamén solicita que busquen a forma de resarcir a totalidade dos danos sufridos por cada un dos seus asegurados sen perder de vista a excepcionalidade deste sinistro.
O asesor xurídico posto a disposición dos damnificados polo Concello tudense bota de menos, segundo un comunicado, "unha comunicación fluída de moitas das compañías cos seus asegurados ou co asesor municipal para atopar unha solución o máis rápida posible e satisfactoria para os clientes".
Insiste o Consistorio en " trato excepcional que requiren os afectados debido á excepcionalidade e magnitude dos feitos nos que se viron afectadas 414 vivendas e máis de 70 vehículos".
