Unión Profesional de Galicia representa xa a 43 colexios profesionais da comunidade tras a incorporación de Fisioterapeutas e Axentes da Propiedade Inmobiliaria. Na súa asemblea xeral, celebrada hai uns días en Compostela, autorizouse esta anexión. Ademais, o Colexio de Geólogos de Galicia solicitou o seu ingreso, co que podería integrarse tamén nas próximas semanas.
O máximo responsable da asociación, Antonio Macho Senra, presidiu o conclave que serviu para pechar 2019 e marcar os obxectivos para o novo exercicio. A entidade, que defende os intereses dos entes colexiais de ámbito autonómico, presentará no primeiro trimestre de 2020 a décima edición da Guía de Peritos Xudiciais e Mediadores de Galicia.
Doutra banda, volverá convocar e a entregar os II Premios Profesionais Colexiados do Ano 2020, un galardón que recoñece "a excelencia dos profesionais colexiados que exercen ou exerceron a súa profesión en Galicia".
MEDIACIÓN. A asociación aspira a liderar a mediación en Galicia como ferramenta para a resolución extraxudicial de conflitos en todo tipo de ámbitos. "Os colexios profesionais queremos ser protagonistas da construción da Galicia do futuro, queremos estar presentes de forma activa na sociedade”, resume o presidente nun comunicado.