A Universidade de Santiago de Compostela (USC) remitiu á Fiscalía o expediente relativo ao profesor Luciano Méndez Naya polas súas declaracións de apoio á Manda, por se as súas palabras puidesen constituír un delito.
Esta decisión, que confirmou a institución a Europa Press, prodúcese tras concluír o expediente aberto a este docente por mor de varios vídeos colgados en redes sociais nos que criticaba á vítima da Manda e mostraba o seu apoio aos condenados.
A pesar de que, xa no seu momento, a institución compostelá desvinculouse e criticou estas opinións, o expediente concluíu que a USC non pode levar a cabo ningunha medida contra Méndez Naya, dado que as opinións foron realizadas nun contexto privado e non vinculado á súa actividade docente.
No entanto, si remitiu todo o contido do expediente á Fiscalía para que sexa esta a que determine se Luciano Méndez ten algún tipo de responsabilidade delictuosa polas súas palabras.
As opinións, vertidas por este docente en redes sociais a través de varios vídeos, xeraron un forte malestar entre colectivos feministas e estudantís, que se manifestaron ante a USC para pedir a expulsión do profesor, que xa foi obxecto dun expediente anterior por un comportamento inadecuado cunha alumna.
