Sanxenxo amenceu conmocionado na véspera do Día de Nadal tras coñecer, na tarde do domingo, un novo capítulo de violencia machista nas súas rúas. Na madrugada do sábado, dúas mulleres foron golpeadas por un home, F. O., veciño de Vilanova de Arousa, logo de que el mesmo as increpase.
Un grupo de mulleres dirixíase á zona de lecer nocturno do porto sanxenxino cando o agresor, de 29 anos, comezou a increpalas. Logo de escoitar vario improperios, unha das mozas decidiu responderlle intentando atallar as súas ofensas cando F. O. arremeteu contra ela dándolle unha puñada, tirándoa ao chan, segundo testemuñas presenciais.
As agredidas desprazáronse á PAC de Portonovo onde denuncian que "a atención foi lamentable"
Ante esta situación, as súas amigas reaccionaron rapidamente recriminándolle o sucedido, ao que o agresor contestou con outro golpe. Esta segunda puñada terminou cunha segunda vítima no chan, o que lle provocou lesións na cabeza e as costelas.
Tras as dúas agresións, o individuo fuxiu á carreira polo Paseo de Silgar, dirixíndose cara á rúa Luís Rocafort. Un grupo de mulleres seguiuno para gravalo e ata comprobar, na Estación de Autobuses da vila sanxenxina, que a Policía Local o detiña.
Posteriormente, as agredidas desprazáronse á PAC de Portonovo onde denuncian que "a atención foi lamentable, cunha gran falta de tacto e empatía incribles. Pareciamos os agresores no canto das vítimas", comentan.
Unha das testemuñas que se atopaban no lugar dos feitos foi a portavoz do grupo nacionalista no concello de Sanxenxo, Sandra Fernández Agraso. Compunxida, compartiu na súa conta persoal de Facebook a historia que, para ela, é a xustificación de que "isto non vai de malas persoas" senón de machismo "patriarcal". A publicación foi compartida preto de 400 veces en apenas unhas horas por usuarios que mostraron a súa indignación polo acontecido.
