O Xulgado de instrución número 3 de Vigo ordenou o levantamento este venres do precinto xudicial da zona afundida durante o festival O Marisquiño e delegou no porto que manteña a limitación do acceso á mesma.
Nun oficio dirixido á Autoridade Portuaria de Vigo, a maxistrada que instrúe a causa pídelle que adopte "as medidas que considere oportunas" para garantir a seguridade na zona do accidente, "procedendo, se así o estima conveniente, á súa derriba e nova construción".
Abunda en que o ámbito onde se produciu o accidente queda "á libre disposición" da Autoridade Portuaria, ao tratarse dunha zona que se atopa dentro do dominio público e, xa que logo, de propiedade estatal, con independencia das disposicións sobre o uso que estivesen reglamentariamente establecidas".
Todo iso, engade o xuíz no seu oficio, "á marxe das responsabilidades penais, civís ou administrativas que puidesen derivarse do resultado da instrución" da causa aberta polo accidente do Marisquiño.
O presidente da Autoridade Portuaria de Vigo, Enrique López Veiga, anunciou que a entidade acoutará a zona afundida durante o festival O Marisquiño, tras o levantamento do precinto xudicial, pero non a reparará ata que se diriman responsabilidades" sobre o accidente.
López Veiga argumentou en rolda de prensa que "o que fixo o dano é o que se ten que facer cargo del (o peirao) e, polo tanto, se pode evitarse, non imos pagalo os contribuíntes", engadiu.
Ata que se proceda á reparación da zona, o porto instalará cámaras de vixilancia, en vista de que ultimamente apareceron as bridas dos precintos rotas.
Mentres, o alcalde de Vigo, Abel Caballero, expresou o seu respecto ao oficio do xuíz, "que di o que di", e que, segundo cre, está en consonancia co que sostivo desde o día despois do accidente. O rexedor ratificouse en que aquel é "un espazo portuario", e engadiu: "xa o di unha xuíza, non Abel Caballero".
CRÍTICAS ÁXUNTA. A organización do Festival O Marisquiño critica que a Xunta descarte finalmente aumentar a súa implicación e apoio financeiro ao certame con vistas á celebración do Xacobeo en 2021.
Nun comunicado, a organización do festival di sentirse "decepcionada e enganada" tras as "reiteradas promesas" da administración galega de colaborar dunha "forma máis comprometida" á mantenta do próximo Ano Santo.
Abunda en que "a decepción" tras a negativa da Xunta "foi enorme por inesperada", e atribúe esta decisión ao "desinterese" da administración galega por investir no maior evento de cultura urbana e deportes de acción do sur de Europa "por causas exclusivamente de política local".
Por contra, os organizadores do Marisquiño valoran que se retomaron as conversacións co Injuve e o Consello Superior de Deportes para sumar o apoio do Estado na edición de 2019.
Fontes da Xunta precisan que a organización solicitara unha achega extraordinaria de 150.000 euros adicionais ao que viña recibindo da Consellería de Cultura. O departamento de Román Rodríguez, segundo estas fontes, ofreceulle aos organizadores do festival manter a achega de anos anteriores e deixar aberta a posibilidade dun "pequeno incremento", ao que estes responderon que "renunciaban" ás axudas.
