A conselleira do Mar, Rosa Quintana, avanzou este martes que o seu departamento está a intensificar os labores de vixilancia contra o furtivismo naquelas zonas de maior incidencia con motivo das festas de Semana Santa. Así o trasladou nunha visita que realizou á unidade operativa do Servizo de Gardacostas en Ribeira, acompañada polo subdirector xeral do servizo, Lino Sexto.
Deste xeito, explicou que a intensificación centrarase nos campos da comercialización e da restauración, a través de inspeccións en puntos de venda e en establecementos de hostalería, onde se revisará que a mercancía que ofrecen conta coa documentación legal pertinente.
Ademais, estenderase a unha actuación conxunta e coordinada con Comercio e coa Axencia Galega de Turismo, que precisamente se iniciará na Semana Santa. O obxectivo é "garantir a todos os que nos visitan que o que consuman aquí será un produto de calidade", remarcou.
Así, a conselleira agradeceu o traballo de control da actividade que realizan os gardacostas e subliñou que se trata dun labor de defensa de todo o sector pesqueiro profesional centrado en facer fronte ás persoas que extraen e venden ilegalmente, prexudicando a saúde dos consumidores.
De feito, nos dous primeiros meses deste ano, o Servizo de Gardacostas realizou case 1.700 inspeccións que resultaron co comiso de case 5.500 quilos de distintas especies de peixe e marisco e coa incautación de 1.150 útiles.
Quintana tamén fixo fincapé na importancia de implicar á sociedade como aliada fundamental na loita contra esta "lacra" que abarca os campos social, económico, sanitario e ambiental.
