Un tribunal de Guatemala absolveu o que fose xefe de Intelixencia Militar de 1982 a 1983, José Mauricio Rodríguez Sánchez, dos delitos de xenocidio e contra os deberes da humanidade por matanzas de centos de integrantes do pobo ixil. Nunha decisión dividida, por dous votos a un, o Tribunal de Maior Risco B considerou que a Fiscalía non conseguiu quebrantar o estado de inocencia do xeneral retirado Rodríguez Sánchez.
A xuíza presidenta do tribunal, María Eugenia Castellanos, e o xuíz Jaime González concluíron que o acusado non emitiu ordes e non constan probas da súa participación no chamado triángulo ixil, onde ocorreron masacres en 50 aldeas que deixaron como resultado 1.771 membros desa etnia asasinados.
Pola contra, a xuíza Sara Yoc interpretou que Rodríguez, como director de Intelixencia G2, si era responsable dos feitos. O tribunal considerou, ademais, por unanimidade que en Guatemala si houbo xenocidio e delitos contra os deberes da humanidade en prexuízo do pobo ixil, no departamento norteño de Quiché, a mans do Exército entre 1982 e 1983, durante a administración do presidente de facto José Efraín Ríos Montt, falecido en abril.
