Unha parella de mozas resultou ferida tras ser obxecto dun ataque homófobo e misóxino perpetrado por un grupo de homes nun autobús de Londres, segundo informou a policía británica. Melania Geymonat, unha azafata de Ryanair de nacionalidade uruguaia de 28 anos, indicou na súa conta de Facebook que a agresión física e verbal que sufriu a mans de catro mozos contra ela e a súa parella, a estadounidense Chris, sucedeu cando se atopaban na parte de arriba do vehículo durante a madrugada do pasado 30 de maio.
A policía metropolitana de Londres informou este venres pola tarde da detención de catro homes, de entre 15 e 18 anos, que permanecen arrestados como sospeitosos de roubo e delitos de odio. As dúas mulleres, que foron dadas de alta no hospital, foron atacadas cando os homes se decataron de que eran parella e empezaron a increpalas, pedíndolles que se bicasen e facendo, ao mesmo tempo, xestos sexuais cara elas.
As mozas, que terminaron cubertas de sangue a consecuencia dos golpes recibidos, fixéronse fotografías tras o ataque que posteriormente colgaron en redes sociais a modo de denuncia. "Nun intento por acougar as cousas, empecei a chancear. Pensei que isto igual lles facía marcharse (aos agresores). Chris incluso finxiu que estaba enferma, pero seguiron acosándonos e lanzándonos moedas cada vez máis exaltados", contou Geymonat na súa páxina de Facebook.
Ambas as mulleres tiveron que ser trasladadas a un hospital para recibir tratamento por varias lesións faciais
"O seguinte que recordo —agrega— é que Chris está no medio do autobús loitando con eles. Nun impulso, achégome para ver que ten a cara chea de sangue e que tres deles estanlle pegando".
A moza uruguaia tamén recorda que a ela lle deron puñadas", que se mareou ao ver o sangue e que caeu.
"Non me acordo de se perdín ou non a conciencia. De súpeto, o autobús parara, a policía estaba alí e eu sangraba por todas partes", dixo a afectada, á que ademais de fracturar o nariz, o grupo de vándalos rouboulle un teléfono e o bolso antes de fuxir.
A consecuencia do sucedido, ambas as mulleres tiveron que ser trasladadas a un hospital para recibir tratamento por varias lesións faciais. Unha delas indicou que un dos agresores falaba español e que os outros tiñan acento británico.
O alcalde de Londres, Sadiq Khan, reaccionou ao sucedido cunha mensaxe na súa conta de Twitter: "Isto foi un ataque repugnante e misóxino. Os crimes de odio contra a comunidade LGBT+ non se tolerarán en Londres".
