A policía francesa abriu unha investigación tras a desaparición do presidente de Interpol, o chinés Hongwei Meng, do que a súa familia non ten noticias desde que o pasado día 29 viaxou ao seu país desde Lyon (este de Francia), sede da organización policial internacional, informaron este venres medios locais.
Segundo a radio Europe 1, a esposa de Hongwei, que segue en Lyon cos seus fillos, acudiu á policía porque non tiña ningunha información do seu marido, de 64 anos, desde que emprendeu a viaxe a China.
A Policía Xudicial francesa interrogou á muller de Hongwei e decidiu abrir unha investigación por desaparición inquietante.
Hongwei Meng era vicesecretario de seguridade chinés cando foi elixido á fronte de Interpol en novembro de 2016 en substitución da francesa Mireille Ballestrazzi, para un mandato de catro anos.
Considerado un peso pesado do Partido Comunista Chinés, o seu nomeamento creou gran malestar entre as organizacións defensoras dos dereitos humanos, que consideran que Pequín se serve de Interpol para perseguir a opositores ao réxime.
Interpol, que está integrada por 192 países e coordina a acción policial internacional, asegurou entón que o presidente non se ocupa da dirección operativa da organización, que recae no secretario xeral, posto que na actualidade ocupa o alemán Jürgen Stock.
O artigo 3 dos seus estatutos prohibe toda inxerencia en materia política.
Ademais de representacións en todos os países membros, Interpol conta con sete oficinas rexionais no mundo, que se suman ás que hai ante a ONU, en Nova York, e ante a Unión Europea, en Bruxelas.
O presidente de Interpol, como o resto dos membros de Comité Executivo, elíxeo a Asemblea Xeral da organización na que están representados todos os Estados membros.
As súas funcións son, basicamente, aplicar as orientacións decididas por eses países e supervisar o traballo do secretario xeral.
