O home detido este sábado en Marrocos pola súa presunta relación cos arrestados polo asasinato de dúas turistas escandinavas ten a dobre nacionalidade hispano-suíza e pasaporte español, confirmaron a Efe fontes do Ministerio de Asuntos Exteriores.
A Oficina Central de Investigación Xudicial (BCIJ) de Marrocos explicou a través dun comunicado que a detención se produciu en Marrakech e que o arrestado, de quen non se revelou a identidade, é alguén "de ideoloxía extremista e violenta".
Por iso, a policía marroquí informou da súa detención ao consulado xeral de España en Casabranca, que está a prestar a "asistencia consular habitual" a un nacional arrestado, detallou Exteriores.
As autoridades de Marrocos detiveron os presuntos autores do atentado terrorista ocorrido a mediados de decembro contra as dúas turistas nórdicas, un ataque perpetrado por catro terroristas que gravaron un vídeo no que aparecen prestando lealdade ao Estado Islámico (EI).
