A Policía británica informou o mediodía deste martes de que trata como un posible incidente terrorista un apuñalamento no que tres persoas resultaron feridas na Noitevella nunha estación de tren de Manchester (norte de Inglaterra).
Un home de 25 anos está detido en relación ao ataque e as forzas de seguridade rexistraron un domicilio no norte da cidade inglesa, indicou nunha comparecencia ante os medios o xefe da policía de Manchester, Ian Hopkins.
"Estamos a abordar isto como unha investigación terrorista", declarou o responsable policial, que pediu a colaboración dos cidadáns que poidan achegar imaxes e outros detalles do suceso.
Un home e unha muller duns 50 anos están ingresados con feridas graves no abdome e no rostro, aínda que non se teme pola súa vida, mentres que un axente de policía que recibiu unha puñalada no ombreiro foi dado de alta
O ataque produciuse minutos antes das 21.00 GMT na céntrica estación de Vitoria da cidade inglesa.
Testemuñas do ataque relataron a medios británicos que o autor gritou consignas islamitas e foi reducido por varios policías.
"Publicáronse moitas informacións na prensa sobre aquilo que supostamente dixo o atacante durante o incidente e, por iso, quero deixar claro que estamos a tratar isto como unha investigación terrorista", afirmou pola súa banda o axudante do xefe de policía Russ Jackson.
"Con todo, é importante subliñar que mantemos unha mente aberta sobre os motivos que levaron a este ataque", resaltou Jackson, que puntualizou que non hai evidencias que fagan pensar que houbo máis persoas involucradas no incidente.
A primeira ministra, Theresa May, expresou a través das redes sociais que os seus pensamentos "están con aqueles que foron feridos polo presunto ataque terrorista en Manchester".
A xefa de Goberno agradeceu así mesmo a actuación dos servizos de urxencia pola "súa valente resposta" ante o incidente.
O ministro de Interior, Sajid Javid, declarou así mesmo a súa solidariedade coas tres vítimas do "incidente" e desexoulles unha "completa recuperación".
A estación de Vitoria da cidade británica reabriu ao público esta mañá e os trens circulan con regularidade, aínda que con atrasos menores.
