A comunidade internacional condenou hoxe de forma unánime o asasinato do líder opositor ruso Borís Nemtsov e esixido a Rusia unha investigación rápida e independente que leve os culpables ante a Xustiza.
"Condenamos este brutal asasinato e urximos ao Goberno ruso a que leve ao cabo unha investigación rápida, imparcial e transparente sobre as circunstancias deste crime, e a que garanta que os responsables son levados ante a Xustiza", dixo o presidente de Estados Unidos, Barack Obama, segundo un comunicado da Casa Branca.
Nemtsov, viceprimeiro ministro de dous gabinetes rusos en 1997 e 1998, durante a presidencia de Borís Yeltsin, recibiu onte á noite catro disparos mortais nas costas cando paseaba por unha ponte moscovita próximo ao Kremlin, acompañado dunha moza procedente de Ucraína.
"Loitaba por unha Rusia moderna, próspera e democrática, aberta ao mundo"
"Era un defensor incansable dos dereitos de todos os cidadáns rusos. Eu sempre admirei a súa valente dedicación a loitar contra a corrupción en Rusia e a súa disposición a compartir os seus puntos de vista cando nos atopamos en Moscova en 2009", explicou Obama.
A alta representante de Política Exterior da UE, Federica Mogherini, sinalou que "a UE espera que as autoridades rusas conduzan unha completa, rápida e transparente investigación do asasinato, coa fin de levar os responsables ante a xustiza".
Nemtsov "loitaba por unha Rusia moderna, próspera e democrática, aberta ao mundo", destacou Mogherini.
Na mesma liña, a chanceler alemá, Angela Merkel, esixiu hoxe ao presidente ruso, Vladímir Putin, que facilite que "o asasinato sexa investigado e que os responsables comparezan ante a xustiza", segundo explicou nun comunicado o portavoz do Executivo alemán, Steffen Seibert.
A chanceler, que mostrouse "consternada" polo asasinato, destacou a "valentía" de Nemtsov polas súas "críticas abertas" ás políticas do actual Executivo en Moscova.
Putin non tardou en sinalar que o crime "ten toda a pinta dun asasinato por encargo, de carácter sumamente provocador", e asumiu persoalmente o control sobre a investigación, segundo o portavoz do Kremlin, Dmitri Peskov.
O presidente de Francia, François Hollande, cualificou de "odioso" o asasinato e destacou que "Nemtsov era un defensor valente e incansable da democracia e un combatente empedernido contra a corrupción", segundo un comunicado do Palacio do Elíseo.
O primeiro ministro británico, David Cameron, dixo así mesmo que o "cruel" asasinato debe ser "totalmente investigado, rapidamente e de xeito transparente, e os responsables deben ser levados ante a Xustiza".
"Borís Nemtsov está morto, pero os valores que defendeu nunca morrerán", subliñou Cameron, nunha declaración divulgada hoxe.
Antes, o Ministerio británico de Exteriores pedira tamén que os responsables sexan levados ante a Xustiza.
