A ONG Médicos Sen Fronteiras (MSF) admitiu que rexistrou no seo da súa organización 24 casos de acoso ou de abusos sexuais ao longo de 2017, que se saldaron co despedimento de 19 persoas.
A organización, fundada en París en 1971, explicó nun comunicado que das 146 queixas que recibiu de entre os seus 40.000 empregados en todo o mundo, 24 delas tratábanse de casos de acoso ou de abusos sexuais.
Esta revelación de MSF únese á da británica Oxfam, na que exdirectivos e cooperantes da ONG encubriron en 2010 orxías e pagaron a prostitutas en Haití, despois de que ese país fose arrasado por un terremoto.
En España, Médicos Sen Fronteiras detectou en 2017 un total de seis casos de abuso sexual entre traballadores que derivaron en catro despedimentos e dúas sancións, segundo explicou o presidente da organización, David Noguera, que pediu que non se confunda a situación que se vive nesta ONG cos escándalos relativos a prostitución e abuso de menores denunciados polo Sunday Times noutras entidades.
"É necesario pór estes datos en contexto, que a xente non confunda 24 casos con 24 orxías"
"É necesario pór estes datos en contexto, que o a xente non confunda 24 casos con 24 orxías. O exemplo de Oxfam é dunha excepcionalidade absoluta. Tivemos os nosos casos e tivémolos que xestionar", explicou en declaracións a Europa Press, despois de que a matriz francesa da ONG recoñeza este mércores 14 de febreiro a través dun comunicado que o ano pasado detectou 24 casos de acoso ou abuso sexual.
En concreto, en MSF España recibíronse 14 denuncias en 2017, das cales se tramitaron dez como comportamentos inadecuados: un por discriminación, outro por ruptura das regras de seguridade, 2 por mala xestión de equipo e 6 confirmados como acoso sexual entre traballadores da ONG –desde comentarios inapropiados ata tocamentos– aínda que en ningún caso se produciu unha violación.
