Un escuadrón de cabalería da Policía Nacional patrullará ata setembro o tramo do Camiño Portugués entre as localidades de Redondela e Pontevedra para que os seus usuarios poidan percorrelo con plenas "garantías" de seguridade.
Así o destacou Julio Serrano, o subinspector do Corpo Nacional de Policía encargado desta unidade de cabalería, tras presentar aos seis cabalos e aos seis axentes que integrarán este dispositivo, enmarcado dentro do programa de turismo seguro. Nun acto celebrado en Pontevedra, Serrano explicou que o uso destes animais permite á policía "acceder a sitios" aos que cun vehículo "non podemos chegar" e ir dun punto a outro, atravesando o monte, "en moito menos tempo".
O primeiro tramo do Camiño Portugués en Galicia, entre Tui e Redondela, estará a cargo da Garda Civil, segundo explicou a subdelegada do Goberno en Pontevedra, Maica Larriba. Larriba detallou que os axentes dacabalo prestarán "especial atención" ás necesidades dos peregrinos que percorran esta ruta, pero entre os seus labores tamén estará a vixilancia ante posibles incendios forestais ou a seguridade en áreas rurais.
Os seis cabalos que forman parte desta patrulla son de pura raza española, coñecida no oficio polo seu acrónimo PRE, unha raza especialmente preparada para enfrontar diferentes terreos, tanto urbanos como rurais, e contornas de traballo hostís. "Acabamos de vir da Eurocopa de Sevilla, onde fixeron un traballo excelente entre os asubíos e o barullo da xente, así que para eles ir polo monte é case como un descanso, é a súa contorna natural", explicou o subinspector Serrano.
Tras destacar a "capacidade de aguante" destes animais, que tamén participaron entre outros operativos na procura da esquiadora Branca Fernández Ochoa, o seu responsable sinalou que os seus xinetes "son policías igual que o resto", co mesmo equipamento e armas.
