A Policía Nacional mantén aberta unha investigación no marco da que busca a catro persoas dunha banda itinerante en relación a tres roubos rexistrados na tarde noite do venres en sendas vivendas en Santiago de Compostela de tres axentes das forzas e corpos de seguridade.
Segundo informaron a Europa Press fontes próximas á investigación, os feitos sucederon na tarde-noite do venres cando lle deron o alto a un coche roubado en Murcia, un Opel Astra, no que ían catro individuos na zona das Cancelas. O turismo no que circulaban chocou contra un vehículo nas proximidades do centro comercial As Cancelas, tras o que se deron á fuga á carreira.
As mesmas fontes explicaron que cando sucederon eses feitos produciuse nesa última hora tres roubos en vivendas na zona de Cancelas que, casualmente, tiveron lugar nas vivendas dun axente da Policía Nacional, doutro da Policía Local e doutro da Garda Civil.
PISTOLAS, XOIAS E DIÑEIRO. Dunha das vivendas levaron dúas pistolas e nas outras dúas xoias e diñeiro, segundo apuntaron as mesmas fontes, que subliñaron que o feito de que fosen domicilios de axentes foi "mera casualidade". A Policía Nacional continúa coas pescudas para identificar, localizar e deter aos catro individuos en relación con estes roubos que atribúen a unha banda itinerante.
