A sección segunda da Audiencia Provincial da Coruña condenou este mércores a dous anos e medio de prisión ao acusado de apuñalar á súa nai en 2014 porque esta non quixo prestarlle diñeiro. O 11 de setembro de 2014 un mozo coruñés quixo que a súa nai lle prestase diñeiro, aínda que esta negouse a darllo e as consecuencias puideron ser fatais.
Colleu o procesado un coitelo xamoneiro na cociña e con el apuñalouna, polo que o fiscal pedía cinco anos e catorce días de prisión ao consideralo autor dunha tentativa de homicidio, delito polo que leva en prisión provisional desde entón.
No xuízo celebrado este mércores, o acusado aceptou unha condena de dous anos e seis meses de prisión como autor dun delito de lesións con instrumento perigoso, polo que tamén ten tres anos e seis meses de afastamento da vítima e debe pagar 7.324 euros ao Sergas en concepto de responsabilidade civil. Recoñece o fiscal que cando se produciron os feitos, o agora condenado vivía unha situación de tensión que modificaba as súas facultades.
Na condena acéptanse as circunstancias agravantes de aleivosía e parentesco mentres que están recoñecidas as atenuantes de arrebato por obcecación e reparación do dano, pois tras a agresión o condenado avisou de inmediato para que socorresen á súa nai.
Condenado a prisión por apuñalar á súa nai porque non lle prestou diñeiro
O procesado colleu un coitelo xamoneiro na cociña e apuñalou á súa proxenitora
