A Policía Nacional detivo a unha moza de 19 anos acusada de matar este domingo dunha puñalada a unha menor de 17 anos na localidade madrileña de Alcorcón.
Fontes policiais confirmaron a Efe a detención da moza, á que se atribúe a morte de Denise, a moza de 17 anos e orixe romanesa, que apareceu o domingo ferida no abdome en plena rúa e que faleceu horas despois no Hospital Fundación de Alcorcón.
O pai da menor asegurou o luns que a súa filla lle contou que recibía "ameazas" a través do WhatsApp da noiva da súa exparella, aínda que a última vez que falou con ela, o pasado sábado, díxolle que "o tiña controlado" e que "deixara de ameazala".
O pai sospeita que esta moza pode ser a responsable do apuñalamento, aínda que as fontes da investigación non confirmaron polo momento a Efe que se trate desta mesma persoa.
En declaracións a Telemadrid, o pai da asasinada sinalou que a súa filla lle dixo que esa moza "está zumbada, está tola, que son só palabras". "Cando me dixo que estaba ameazada pregunteille se quería que o falase coa moza ou co pai da moza, que me comentou que traballa na Garda Civil. Entón crín que eran xente boa", narrou o pai que explicou que a súa filla lle dixo que "non fixese nada, que o tiña controlado".
Os efectivos médicos efectuaron manobras de reanimación cardiopulmonar e tras ser estabilizada a vítima foi trasladada ao Hospital, onde finalmente morreu.