Un home resultou ferido de consideración ao caerse ás vías do tren na estación de Ourense, cando trataba de subir ao convoi que acaba de iniciar a marcha. Aínda que sufriu unha fractura e unha ferida aberta nunha das súas pernas, a súa vida non corre perigo.
Así o informou a Policía Nacional de Ourense a Europa Press, que precisou que os feitos ocorreron ao redor das once da mañá. O home, de orixe francesa e nado no ano 1968, era un peregrino que, tras realizar o Camiño de Santiago, estaba a viaxar no tren, no traxecto entre Santiago e Irún.
O ferrocarril realiza unha parada duns 20 minutos na estación do Empalme en Ourense, debido a un desdobramento da vía. Nese tempo, o home baixouse do tren para fumar un cigarro e, cando se atopaba sentado nun banco da estación, deuse de conta de que o convoi estaba a reiniciar a marcha.
Ao achegarse para subir ao tren perdeu pe, segundo indica a Policía Nacional, e caeu ás vías. Con todo, puido introducirse nun oco que había debaixo da plataforma e só sufriu feridas e fracturas nunha perna pero sen amputación.
Ata o lugar desprazáronse efectivos dos bombeiros de Ourense, dos servizos sanitarios, da Policía Local e a Policía Nacional. Tras os primeiros coidados, os profesionais sanitarios lograron estabilizar ao ferido e trasladárono ao Hospital de Ourense.
O tráfico ferroviario quedou momentaneamente suspendido, explicou a Policía Nacional, ata que se logrou rescatar ao peregrino.
