Un traballador que realizaba traballos de asfaltado na localidade ourensá de Barbadás resultou ferido na mañá deste martes tras sufrir un accidente manexando unha máquina.
Segundo informou o CAE-112 Galicia, o suceso ocorreu sobre as 11.30 horas deste martes na estrada OU-540, onde o operario, traballador dunha empresa de construción, realizaba traballos de asfaltado cando unha máquina lle pasou por encima dun pé.
Ata o lugar do suceso desprazáronse efectivos da Garda Civil e de Protección Civil, así como persoal sanitario do 061, que trasladou ao ferido a un centro sanitario.