Atopan seis cachorros mortos a golpes no municipio ourensán de Castrelo do Val

Membros da protectora de animais de Verín denunciaron ante a Garda Civil a morte de seis cachorros, que foron golpeados na cabeza ata morrer na localidade de Castrelo do Val, na provincia de Ourense. A protectora ourensá está a centrar os seus esforzos en intentar sacar á cadela dese mesmo lugar e levala a outro sitio. Os animais apareceron mortos nunha leira particular, situada nas inmediacións dunha obra. 

Segundo explicaron a Efe fontes da protectora, os cachorros, que tiñan un mes de vida, foron golpeados este luns, horas antes de que fosen recollidos pola protectora para levalos a casas de acollida. A cadela, de raza grifón, continúa xunto aos animais, e os membros da protectora están a pensar en sedala, posto que leva varias horas sen comer e sen beber e ao aire libre, nunha xornada marcada polas baixas temperaturas. 

"Atopamos aos cachorros desnucados e decidimos presentar denuncia", apuntaron. Así, esta asociación relatou a Efe que esta cadela estaba abandonada e vivía na rúa aínda que era atendida por un matrimonio que tiña unha casa xunto á obra, que era quen se encargaba de alimentalos". 

Desde a protectora afirman que non é a primeira vez que ocorren este tipo de feitos na zona de Monterrei e falan de casos "continuos" de malos tratos a animais. Anteriormente a este episodio, xa acharon mortos máis cachorros desta mesma cadela e a semana pasada localizaron "un gato morto, que recibira tres balines". Advirten de que non son os únicos casos e que hai máis animais abandonados na zona "en moi malas condicións, algúns encadeados". 

Ante esta situación, a protectora presentou a correspondente denuncia ante a Garda Civil. Confían en que os axentes poidan identificar ao autor ou autores da morte dos animais.