A Garda Civil imputou un terceiro individuo, de dezasete anos, no marco da operación Desesperados que investiga os roubos en numerosos puntos de Milladoiro, en Ames.
Os axentes investigan varios delitos contra o patrimonio, entre eles roubos, furtos en interior de garaxes, trasteiros ou interior de vehículos cometidos no núcleo urbano desa localidade.
O pasado 16 de maio a Garda Civil detivo en Boiro catro persoas cando circulaban nun vehículo que fora subtraído en Milladoiro e dous destes agora están imputados como reincidentes.
A eles únese un terceiro individuo menor de idade, de dezasete anos, que tamén estaría implicado nos ilícitos labores en Ames.
Froito desta operación aprehenderon algúns dos obxectos subtraídos, que puideron ser recuperados e entregados aos seus lexítimos propietarios.
Os feitos serán postos en coñecemento do xulgado de garda de Santiago de Compostela e da Fiscalía de menores da Coruña no caso do menor de idade, informa a Garda Civil a través dun comunicado.
