Membros da Garda Civil de Tráfico de Pontevedra investigan a unha veciña de Ourense de 51 anos por un presunto delito de atentado a axente da autoridade logo de ser sancionada por exceso de velocidade mentres circulaba pola PO-221, no termo municipal de Moraña.
A muller, que circulaba a 70 quilómetros por hora por unha vía limitada a 50, agarrou ao funcionario que lle entregaba a copia da denuncia e emprendeu a marcha, arrastrándoo uns 25 metros, aínda que sen causarlle lesións de consideración, segundo sinalan fontes do Instituto Armado.
A Garda Civil localizou o vehículo minutos despois xunto á parada de taxis do centro urbano de Moraña e á condutora no seu interior.
As probas de alcoholemia e de detección de drogas ás que a someteron deron negativo.
