Axentes de Tráfico do subsector de Ourense interceptaron a un condutor dun cuadriciclo lixeiro –un coche sen carné– que circulou 22 quilómetros pola A-52, coincidindo coa operación retorno da Ponte de San José. O home mostraba supostamente síntomas de desorientación.
Segundo informou a Comandancia de Ourense, sobre as 11.40 horas, a central operativa de servizos de Tráfico recibiu un aviso do CAE 112 Galicia no que varios condutores daban aviso de que circulaba á altura da localidade ourensá de Allariz un coche sen carné a unha velocidade moi reducida. Por mor destes feitos, as patrullas procederon á súa interceptación ante o risco que entrañaba que fose alcanzado.
As citadas fontes precisaron que o condutor, D.D.F., de 45 anos e veciño desta localidade, nada máis ser interceptado, á altura de Xinzo, relatou "que se dirixía a Xinzo e que lle parecía demasiado ancha para ser unha estrada nacional". Por este motivo, a Garda Civil propuxo que o home fora valorado polos servizos de inspección sanitaria da Xunta tras proceder á retirada do vehículo.
Tal e como recordaron, o Regulamento de Circulación establece que os condutores de coches sen carné "non poden circular por autoestradas nin autovías". "Só poden utilizar vías urbanas e estradas convencionais", concluíron nun comunicado
Interceptan a un condutor dun coche sen carné que circulou pola A-52
O home, de 45 anos, presentaba síntomas de desorientación e dirixíase a Xinzo de Limia
