Unha colisión entre dous vehículos na madrugada deste sábado deixou unha persoa ferida no Concello ourensán de Taboadela, concretamente, na saída do Polígono de San Cibrao, dirección Allariz.
O CAE 112 Galicia, grazas a testemuñas que presenciaron o accidente, puido porse en contacto cun dos implicados quen, asegurou, que se saltou un sinal de stop. Así, o 112 Galicia ademais de pedir a intervención dos efectivos do parque comarcal e dos servizos sanitarios, avisou á Garda Civil de Tráfico e ao GES de Pereiro de Aguiar.
Debido ao impacto, un poste da luz tamén se viu afectado, polo que, tamén se pasou aviso ao servizo da empresa subministradora.
O ferido, tras ser liberado polos bombeiros, do interior do vehículo, foi atendido polo persoal sanitario desprazado ao lugar. O accidente tivo lugar sobre as 05: 30 horas da madrugada.
Atrapada unha persoa tras a colisión de dous vehículos na localidade ourensana de Taboadela
O accidente produciuse tras saltarse un dos implicados un sinal de stop
