Un home, de 64 anos, faleceu a madrugada deste martes ao xoves logo de sufrir un accidente co vehículo que conducía en Coristanco, segundo informa o 112.
Segundo a información facilitada polo servizo de urxencias, o sinistro produciuse na AC-552, á entrada da vila coruñesa, ao redor das 3:30 horas da madrugada, cando o turismo que manexaba a vítima saíuse da vía e chocou contra unha árbore. Como consecuencia do impacto, o condutor quedou, ademais, atrapado no interior do vehículo, polo que foi necesario empregar o equipo de excarceración.
Este operativo activouse logo de recibir no Centro Integrado de Atención ás Urxencias (CIAE) 112 Galicia a chamada de alerta dos bombeiros de Carballo, que se desprazaban ao lugar do accidente para liberar á vítima. Deseguido, os xestores do 112 avisaron aos membros do GES de Ponteceso e aos profesionais do 061-Urxencias Sanitarias, que se sumaron ás tarefas de rescate xunto cos axentes da Garda Civil de Tráfico. Con todo, nada puideron facer para salvar a vida do ocupante do vehículo.
A Garda Civil explica, a través dun comunicado, que investiga as causas do accidente, que aínda se descoñecen. Recomenda, ademais, precaución cando se conduce con visibilidade reducida, o uso do cinto de seguridade, manter unha velocidade adecuada e evitar o consumo de sustancias que alteren as condicións psicofísicas.
ARTEIXO. Tamén na AC-552, pero na localidade de Arteixo, rexistrouse este martes outro accidente de tráfico no que resultou ferido un home. Segundo explicaron os efectivos de urxencias, o vehículo envorcou logo de saírse da vía ao paso por Vilarrodís, nunha zona de curvas.
Pese ao impacto, a persoa estaba liberada e accesible, polo que os bombeiros de Arteixo descataron intervir. Iso si, o condutor necesitou asistencia médica e incluso foi trasladado ao Hospital Modelo da Coruña nunha ambulancia do 061-Urxencias Sanitarias.
Foron varios os particulares que chamaron ao 112 Galicia para informar o suceso cando faltaba un cuarto de hora para as dez da noite pasada.
