Un home faleceu este venres cando cortaba as ramas dunha árbore ao realizar labores de poda nunha leira súa no municipio pontevedrés de Nigrán. Tras a morte este xoves dun sesaxenario nas Nogais en parecidas circunstancias, xa son sete as vítimas mortais rexistradas no que vai de ano en Galicia en tallas e podas.
Segundo informou o 112 Galicia, o suceso ocorreu ás 11.00 horas deste venres no lugar das Antonesas, onde a vítima realizaba traballos agrícolas nunha leira da súa propiedade.
Foi un veciño quen alertou mediante unha chamada ao 112 Galicia para pedir asistencia médica urxente, xa que o home recibira un forte golpe na cabeza cunha rama, relataron as mesmas fontes.
Deste xeito, os xestores do 112 Galicia avisaron aos profesionais do 061, que trataron de reanimar ao home sen éxito, confirmaron as mesmas fontes.
Ademais, o equipo médico contou co apoio dos membros do GES de Val Miñor e dos membros da Garda Civil para tratar de aclarar as circunstancias do suceso.
