A Policía Local busca a un mozo duns 22 anos de idade que acoitelou nun brazo a un home duns 65 anos durante unha pelexa no domicilio deste último, situado na Coruña.
Conforme explicou a Policía Local, tras recibir unha chamada na mañá do venres, unha patrulla desprazouse a esta vivenda, onde o home explicou que, a noite anterior, coñecera a un mozo nun local de lecer, ao que invitou á súa casa despois de que lle dixese que non tiña onde durmir. Unha vez no piso, segundo a súa versión, o agresor observou unha carteira con diñeiro, polo que colleu un coitelo da cociña e ameazou con este ao propietario para roubarlle o diñeiro.
A Policía Local explicou que este asegura que se defendeu con outro coitelo, o que derivou nunha pelexa entre ambos. Con todo, o mozo escapou e, ata o momento, non foi localizado.
No lugar, os axentes interviñeron dous coitelos ensanguentados, para o seu depósito en dependencias policiais, e realizaron varias fotos do estado do domicilio para posteriores dilixencias. O home de 65 anos foi trasladado en ambulancia ao Complexo Hospitalario Universitario da Coruña (CHUAC), para recibir atención médica posto que presentaba unha ferida profunda no antebrazo.
